Məqalədə Talış regionunun termal sularında radon qatılığının dərəcəsinin ilk dəfə qiymətləndirilməsinin nəticələri təqdim edilir. 7 termal qaynağın 9 təbii su çıxışının öyrənilməsi nəticəsində radonun geniş hüdudlarda dəyişməsi müəyyən edilmişdir – 3,73 Bq/l-dən 93,3 Bq/l-dək. Bu sularda radonun miqdarı qrunt sularına uyğundur və aşağı radonlu sular kimi təsnif edilir. Həmçinin radonun konsentrasiyası və suyun qaz tərkibi arasında asılılıq təyin edilmişdir: nisbətən aşağı radon səviyyəsi azotlu, yüksək radon konsentrasiyası karbonlu, orta radon səviyyəsi isə metanlı sular üçün xarakterikdir. Sulu horizontların hesablanmış dərinliyi 2,4 km-dən artıq deyil. Sanitar gigiyenik normalara əsasən Yardımlının Bülüdül termal çıxışı istisna olmaqla Talışın termal suları radonun miqdarına görə vanna qəbulu və içməli su kimi istifadə edilməsi zamanı əhalinin sağlamlığı üçün təhlükəli deyil. Bu termal mənbədə radonun miqdarı içməli sular üçün qəbul edilmiş normadan (Rusiyada qəbul olunmuş standartlara əsasən) 1,5 dəfə çoxdur.